გია ბარამიძე: როცა სააკაშვილს თმებით ქაჩავდნენ, გიორგი ვაშაძე პოროშენკოს შტაბში იყო (ინტერვიუ)

„ნაციონალური მოძრაობის“ ერთ-ერთი ლიდერი გია ბარამიძე დარწმუნებულია,რომ ოპოზიცია ამ ხელისუფლებას ყველა ვარიანტში დაამარცხებს, მოხდება ეს პირველი ტურის წინ მაჟორიტარებზე შეთანხმებით თუ არა ,და იმის მიუხედავად, არჩევნები ძველი საარჩევნო სისტემით ჩატარდება თუ ახლით.

ამის შესახებ გია ბარამიძემ „აიპრესთან“ ინტერვიუში ისაუბრა და აღნიშნა, რომ პრიორიტეტი პირველი ტურის წინ შეთანხმებაა, თუმცა განიხილება მეორე ვარიანტიც, რომლის მიხედვითაც მეორე ტურებში გასულ კანდიდატებს უნდა დაუჭირონ მხარი.

გია ბარამიძე პრემიერ-მინისტრობის პოტენციურ კანდიდატად გიორგი ვაშაძის დასახელებაზეც საუბრობს და ამბობს, რომ ხიდებს არ წვავენ, მაგრამ არაადეკვატური ამბიციები არავის უნდა გაუჩნდეს.

ოპოზიციაში მაჟორიტარების თემაზე არაერთგვაროვანი განცხადებები მოვისმინეთ. რა ხდება ამ თვალსაზრისით? გრძელდება თუ არა კოორდინაცია და თქვენი – „ნაციონალური მოძრაობის“ პოზიცია როგორია ამ თემასთან მიმართებით?

_ დიახ, პროცესი გრძელდება. იმის მიუხედავად, რომ როგორც მინიმუმ ორმა პოლიტიკურმა პარტიამ – „ლელომ“ და დავით ჭიჭინაძის „ტრიბუნამ“ განაცხადეს, რომ ისინი დააყენებენ თავიანთ კანდიდატურებს, თუმცა სხვა საკითხებზე თანამშრომლობას და კოორდინაციას არ გამორიცხავენ, რაც მისასალმებელია. იცით, რომ ჩვენი პირველადი იდეა იყო, რომ ყველა პარტიას ჰქონოდა ერთობლივი პოზიცია, დაგვესახელებინა საერთო კანდიდატები და ასე ყოფილიყო, რომ ერთ მხარეს „ქართული ოცნების“ კანდიდატი ყოფილიყო, ხოლო მეორე მხარეს ოპოზიციის საერთო კანდიდატი. თუ სქემა ასე არ იმუშავებს, ჩვენ კონსულტაციებს მაინც გავაგრძელებთ. თუ ეს სქემა არ იმუშავებს, არც ამაში ვხედავთ ტრაგედიას, იმიტომ რომ დარწმუნებულები ვართ, რომ ეს რეჟიმი ყველა ვარიანტში დასრულდება, იმიტომ რომ ქართველმა ხალხმა მიიღო ეს გადაწყვეტილება. ეს რეჟიმი დასრულდება იმის მიუხედავად 73 მაჟორიტარი იქნება თუ 30. შევძლებთ პირველ ტურში შეთანხმებას თუ მეორე ტურში.

_ ალბათ დამეთანხმებით, რომ პირველივე ტურშივე მოხდეს. ასეთი რამე ადრეც გვსმენია, თუნდაც თბილისის მერის არჩევნების დროს და საერთოდ არ შედგა მეორე ტური. როცა ჩიხში შედის მოლაპარაკებები რამდენად სწორია და აქვე გკითხავთ გუბაზ სანიკიძის გაჟღერებულ იდეაზე, რომ ყველამ უნდა დააყენოთ პირველ ტურში კანდიდატები და მეორე ტურში დაუჭიროთ ერთმანეთს მხარი, რამაც გარკვეულ პარტიებში წყენა გამოიწვია, მათ შორის ერთ-ერთი „გირჩი“ იყო, რომელმაც ღიად გამოხატა ეს პოზიცია…

_ ზუსტად მაგაზე ვსაუბრობ მეც, რომ სხვადასხვა მოსაზრება გამოითქვა. ორი პარტია დაგისახელეთ კიდეც, რომლებმაც თქვეს, რომ ყველა ვარიანტში ჩვენს კანდიდატურებს დავაყენებთო. ამიტომ ვამბობ, რომ არც მეორე ტურში შეთანხმება იქნება უმნიშვნელო და არ-დასაფასებელი ამბავი.  თქვენ რა მაგალითიც მოიყვანეთ – ადგილობრივი არჩევნები, იმ დროის შემდეგ ბევრმა წყალმა ჩამოიარა, მას შემდეგ „ქართული ოცნება“ ჩამოიშალა. ფიზიკურადაც რომ შევხედოთ, პარტია მისმა უამრავმა წევრმა და ლიდერმა დატოვა. გარდა იმისა, რომ თუ ვინმეს ეგონა ეკონომიკურად „ქართული ოცნება“ რაღაცას გააკეთებდა, ყველა საღად მოაზროვნე ადამიანს ამ მიმართულებით ყველანაირი იმედი დაეკარგა. 8 წელიწადი დავკარგეთ, უკან-უკან მივდივართ და ციფრებშიც არის ეს გამოხატული. 2012 წელს 16 მილიარდის ღირებულების იყო ეკონომიკა, ახლა უკვე 15.5 მილიარდი გვაქვს.

_ ეს ფაქტები საზოგადოებისთვის ისედაც ცნობილია, რა მონაცემებიც მოგყავთ. თემას რომ დავუბრუნდეთ, არ გგონიათ, რომ ივანიშვილის ინტერესებშია, ოპოზიციამ ვერ მოახერხოს პირველივე ტურში შეთანხმებას?

_ თანმიმდევრულად გიყვებით. ჩაკითხვა პრობლემას არ წარმოადგენს, მაგრამ აზრი უნდა ჩამოგიყალიბოთ, რომ აგიხსნათ ვითარება. კარდინალურად განსხვავდება ადგილობრივი არჩევნებისგან თუ საპრეზიდენტო არჩევნების ვითარებისგან დღევანდელი ვითარება. მას შემდეგ ამ ეკონომიკური კოლაფსის გარდა ბევრი რამე მოხდა. 20 ივნისი იყო, თვალების დათხრა, ამომრჩევლის და საერთაშორისო პარტნიორების მოტყუება, ხალხის გადაგდება, საერთაშორისო ასპარეზიდან იმის თქმა, რომ ჩვენ პოლიტპატიმრები გვყავს. მოკლედ, ყველა მიმართულებით გაუარესება, კორუფციის მიმართულებით მოხდა კიდევ უფრო მეტი ფაქტის გამოვლენა, 700 მილიონის მოპარვაზე თვითონ თქვეს და არ გამოიძიეს და ა. შ. ჩამოიშალა „ოცნების“ ავტორიტეტი. პირველ ტურში „ოცნება“ რომ ვერ გაიმარჯვებს ეს ორჯერ ორი ოთხია.

რაც შეეხება მეორე ტურებში მხარდაჭერის ტაქტიკას, თავისი ლოგიკა ამასაც აქვს. თუ ყველას ეყოლება თავისი მაჟორიტარი პირველ ტურში, ყველა იმუშავებს ყველა პარტიის შესაბამის პროპორციულ ხმებს და ყველა პარტია მაქსიმუმს აიღებს პროპორციულ ნაწილში, ეს იმას ნიშნავს, რომ „ქართული ოცნება“ პროპორციულში აიღებს მინიმუმს. მეორე ტურისთვის იქნება ვითარება, რომ „ოცნება“ მეორე ტურს პროპორციულით მოპოვებული ხმებით მინიმალურით შეხვდება. ამას უდიდესი მნიშვნელობა ექნება მათ შორის ფსიქოლოგიური თვალსაზრისით მეორე ტურის მაჟორიტარული სისტემის მოგების მხრივაც. იმ ოლქებში, სადაც მეორე ტურში იდგება „ოცნება“ და ოპოზიცია, ყველანი დავეხმარებით ოპოზიციას. ეს გათვლა არის ძალიან მნიშვნელოვანი.

არ ჩათვალოთ, რომ ჩვენ ამ წუთას ამ მეორე ვარიანტს ვაყენებთ პირველ რიგში. ჩვენ გავაგრძელებთ მუშაობას, რომ პირველივე ტურში შევთანხმდეთ.

_ ანუ პრიორიტეტი პირველივე ტურში საერთო კანდიდატების დასახელებაა?

_ რა თქმა უნდა, მაგრამ არ მიგვაჩნია მიზანშეწონილად, რომ თუ პირველ ტურში ვერ შევთანხმდით დავიღუპეთ და ივანიშვილი მოიგებს. შეცდომაა ასე მიდგომა.

_ შეხედეთ, რას ამბობს „გირჩი“, მსხვილ პარტიებს ექნებათ შესაძლებლობა, რომ 90% მეორე ტურში გაიყვანონ და გამოდის ჩვენ უნდა დავუჭიროთ მათ მხარი და მათ არ უნდა დაგვიჭირონო. ხომ არ გგონიათ, რომ ამან შესაძლოა გარკვეული ბზარი შეიტანოს?

_ კიდევ ერთხელ ვამბობთ, ჩვენ მხარს ვუჭერთ პირველ ვარიანტს, სადაც შესაძლებელი იქნება, რომ „გირჩის“ წარმომადგენელიც იყოს საერთო ოპოზიციური კანდიდატი, რომელსაც ჩვენც დავუჭერ მხარს. ჩვენთვის პრიორიტეტი იქნებოდა ეს ვარიანტი. იმიტომ კი არა რომ მეორე მნიშვნელოვანი არ არის, არამედ იმიტომ, რომ ეს პატარა პარტიები არ გავანაწყენოთ. არ გვინდა ვინმემ იფიქროს, რომ ჩვენი სიდიდის გამო გაგვიხარდება თუ პატარა პარტია დაიჩაგრება. არა ბატონო. ჩვენ მხარს ვუჭერთ იმას, რომ მომავალ პარლამენტში სხვადასხვა სახის პარტიები იყოს.

შესაძლოა „გირჩისგან“ რადიკალურად განვსხვავდებით გამოხატვის ფორმებშიც და მთელ რიგ იდეოლოგიურ საკითხებშიც, მაგრამ მიგვაჩნია, რომ „გირჩს“ ჰყავს თავისი ელექტორატი და ის უნდა იყოს წარმოდგენილი პარლამენტში.

თუ მივიღებთ პირობად, რომ ოპოზიცია ვიმარჯვებთ, „ნაციონალურ მოძრაობას“ ხომ ყველაზე მეტი დეპუტატი ეყოლება? ამიტომ მრავალპარტიულობა ჩვენთვისაც სასარგებლო იქნება, რადგანაც სრულფასოვანი ოპონირება ყველასთვის სასარგებლო იქნება. ამიტომ ვუჭერთ პირველ ვარიანტს მხარს, რომ ვითვალისწინებთ „გირჩის“ და სხვა პატარა პარტიების არგუმენტებს. მაგრამ თუ გამოვიდა ისე, რომ პარტიები გავიდნენ და მხოლოდ მცირე ნაწილმა მოახერხა, პირველ ტურში მაჟორიტარებზე შეთანხმება იმ პირობებში, როცა სხვა ოპოზიციური პარტიები მაინც დააყენებენ კანდიდატებს, მაშინ აზრს კარგავს. აზრი ექნებოდა მაშინ, რომ იქით ყოფილიყო „ქოცი“ და აქეთ „ნაცი“ კი არა, არამედ მთელი ოპოზიციური სპექტრის კანდიდატი. ვიღაცებს „ქოცები“ შემოყრიან, თავის ღია სატელიტებს დაასახელებინებს კანდიდატებს – „ქართული მარში“ და „პატრიოტთა ალიანსმა“ შესაძლოა დააყენოს თავისი კანდიდატები, მაგრამ ამათ არ ვგულისხმობთ ჩვენ. ვგულისხმობთ იმ პროცესში მონაწილე პარტიებს, რომლებიც „ლეიბორისტების“ ოფისში ვიკრიბებით. არავისკენ არ მინდა ხელი გავიშვირო, მაგრამ ფაქტია, რომ საქმე აქეთკენ მიდის.

_ თაკო ჩარკვიანმა პრემიერ-მინისტრობის პოტენციურ კანდიდატად გიორგი ვაშაძე დაასახელა, რასაც მოჰყვა დიდი განხილვები თუ ვნებათაღელვა. პირადად თქვენთვის და „ნაციონალური მოძრაობისთვის“ ვაშაძის კანდიდატურა მისაღებია?

_ ამის თაობაზე ხომ ითქვა ძალიან მკაფიოდ? ზაალ უდუმაშვილმა ჩვენი სახელით ძალიან მკაფიოდ და ნათლად თქვა ჩვენი პოზიცია. უფრო მეტიც, ჩვენ პატივს ვცემთ ქალბატონი თაკო ჩარკვიანის აზრს, რომელიც გიორგი ვაშაძესთან რა თქმა უნდა წინასწარ იყო შეთანხმებული და ეს ყველაფერი გავლილი ჰქონდათ. ამას გიორგი ვაშაძე როდესაც უარყოფს, ეს ცოტა უხერხულია. სულელი არავინ არ არის. მაგრამ, რაც მოხდა, მოხდა. ჩვენ ვთქვით ჩვენი პოზიცია ვაშაძესთან დაკავშირებით. ვეცდებით, რომ პარტნიორობა შევინარჩუნოთ. იმიტომ, რომ პარტნიორობისთვის რაც არის საჭირო, ეს არის ერთი დონე, მაგრამ პრემიერ-მინისტრობისთვის, ანუ ჩვენი გუნდის ლიდერობისთვის რაც არის საჭირო, ეს მეორე დონეა და ის ათჯერ უფრო მაღალია.

_ თქვენს ინტერესებშია, რომ „ნაციონალური მოძრაობის“ წარმომადგენელი იყოს პრემიერობის კანდიდატი?

_ არა. ის უნდა იყოს, ვისაც ჩვენი მაღალი ნდობა ექნება.

_ ვაშაძეს ასეთი ნდობა არ აქვს?

_ მთელი რიგი მიზეზების გამო მას ამ ხარისხის ნდობა არ აქვს.

_ რა მიზეზების გამო?

_ მაგალითად იმ მიზეზების გამო, რომ როდესაც ყველაზე მძიმე ვითარებაში ვიყავით, ის გავიდა პარტიიდან.

_ მან მაშინ ახსნა ეს. მაშინდელი თქვენი პარტიის და ამჟამად „ევროპული საქართველოს“ ლიდერებთან მას დაპირისპირება ჰქონდა…

_ 2016 წლიდან დღემდე უკან დაბრუნებას რა უდგა წინ? ასე გავიდა ლევან ხაბეიშვილი, მაგრამ დაბრუნდა გულით და სულით და მუშაობს კაცი. 2016 წლიდან 2020-მდე 4 წელი გავიდა. ჩვენ ვთავაზობდით კიდეც ამას გიორგის.

_ კი, მაგრამ უკვე პარტია ჰქონდა და უნდა ეთქვა, უი გაიყვნენ და ისევ უნდა დავბრუნდეო?

_ ზურაბ ჟვანიამ და ჩვენ დავშალეთ ამხელა პარტია, რომელმაც 15% აიღო და 2%-იან პარტიას ვერ დაშლიდა ერთობის გულისთვის?! რას მეუბნებით?

_ სხვა ფორმატით ჩაერთო, საპრეზიდენტო არჩევნების დროს თქვენი კანდიდატურის მხარდაჭერაში ლომის წვლილი შეიტანა. ასე არ იყო?

_ არა, ლომის წვლილი ნამდვილად არ შეუტანია. ლომის წვლილი შეიტანა „ნაციონალურმა მოძრაობამ“. ის სიმბოლურად იყო შტაბის ხელმძღვანელი.

_ ასე გგონიათ, რომ ეს სიმბოლური იყო?

_ მთლად ასეთი სიმბოლური არა, მაგრამ ჩვენთვის მნიშვნელოვანი იყო ხაზი გაგვესვა მრავალპარტიული ბლოკისათვის. ამიტომაც გახდა შტაბის უფროსი გიორგი ვაშაძე, თორემ რეალურს საქმეს აკეთებდა და ლომის წვლილი სწორედ „ნაციონალურ მოძრაობას“, მის მხარდამჭერებსა და მის რეგიონულ სტრუქტურებს შეჰქონდა. შტაბის ხელმძღვანელი რომ იყო, ვის ხელმძღვანელობდა? 99% „ნაციონალური მოძრაობის“ წარმომადგენლები იყვნენ. შტაბის უფროსად „ნაციონალური მოძრაობიდან“ ვერ ავირჩევდით? ჩვენ ეს ჟესტი სწორედ იმ სულისკვეთებიდან გამომდინარე გავაკეთეთ, რაც ჩვენ გვქონდა – ერთიანობის.

_ ვანო ჩხარტიშვილის ნათესავი რომ არის, ეს ფაქტორიც ხომ არ გახდა გადამწყვეტი?

_ იცით რა არის? ამ საკითხებზე არ ვილაპარაკებ. კიდევ სხვა რაღაცებიც არის. მაგალითად გუშინ ეკა კვესიტაძის გადაცემაში ეკამ დაუსვა კითხვა, ეს რანაირად მოახერხე, რომ თან პოროშენკოს საარჩევნო შტაბში იყავი და თან მიხეილ სააკაშვილთანაც თანამშრომლობდიო. ჩვენ ამაზე ვცდილობდით, რომ თვალი დაგვეხუჭა, მაგრამ რბილად და დიპლომატიურად რომ ვთქვათ ეს ცოტა უცნაურია. ეს ხდებოდა იმ მომენტში, როდესაც პოროშენკოს ბრძანებით მიხეილ სააკაშვილს თმებში ექაჩებოდნენ, სახურავებზე არბენინებდნენ და ქვეყნიდან წიხლებით აგდებდნენ.

_ სხვათა შორის გიორგი ვაშაძემ ისიც თქვა, რომ ასეთი შორი მანძილიდან სააკაშვილთან ყველაზე კარგი ურთიერთობა მას აქვს…

_ ამას ვამბობ მეც, ეს ხომ ერთი მეორეს ეწინააღმდეგება?! უკაცრავად, მაგრამ ყველაზე კარგი ურთიერთობა როგორ აქვს? ეგეც ხომ მეტყველებს, ადამიანს რამდენად შეიძლება ენდო? ახლა გიორგი ვაშაძეს ჩემზე უფრო ახლო ურთიერთობა აქვს მიშა სააკაშვილთან? ან გრიგოლ ვაშაძეზე კარგი ურთიერთობა აქვს სააკაშვილთან? „ნაციონალური მოძრაობის“ სამდივნოს წევრები რომ ჩამოგითვალოთ, გიორგი ვაშაძეს უფრო კარგი ურთიერთობა აქვს სააკაშვილთან, ვიდრე ჩვენს ლიდერებს?!

_ თამაშობს ვაშაძე?

_ ტყუის. მთელ რიგ მიმართულებებზე მისი მხრიდან არასწორი, არაგულწრფელი განცხადებები და მოქმედებები გვაიძულებს, რომ მასთან მიმართებაში ფრთხილად ვიყოთ. გარდა იმისა, რომ მიგვატოვა.

არ ვწვავთ ხიდებს, გვესმის ჩვენი პასუხისმგებლობა თანამშრომლობისა და ერთიანობასთან დაკავშირებით. გვინდა ერთიანობის შენარჩუნება, ოღონდ არ გვინდა, რომ ვინმემ სულელად ჩაგვთვალოს. ამიტომ ძალიან გასაგებ რაღაცას ვამბობ. კიდევ რაღაცებს არ ვამბობ, არ მინდა, რომ რაღაცები ჩავშალო.

სულ იმას ვამბობდით, რომ ძველი წყენები და შეცდომები არ უნდა გავიხსენოთ. არავინ არ ვართ უცოდველი და ამიტომ ამ საკითხებს უკანა პლანზე ვწევთ. გვინდა თანამშრომლობა, თან ისე გვინდა, რომ ეს თანამშრომლობა ღირსეული იყოს და ერთმანეთის მიმართ პატივისცემით იყოს განმსჭვალული.

ბოლოს რაც მან გააკეთა, რომ თაკო ჩარკვიანს შეუთანხმდა პრემიერ-მინისტრობა მინდა და მიდი შენ გამოაცხადეო და მე ამაზე ვიმუშავებ, პარტია იმუშავებს, ვივლი, ხალხს შევხვდებიო… ეს არ არის სწორი.

_ თაკო ჩარკვიანის მიმართაც ხომ არ გაგიჩნდათ გარკვეული კითხვები?

_ არა, მაგრამ სამწუხაროა, რომ ეს მოხდა. უმჯობესი იქნებოდა, რომ სანამ ქალბატონი თაკო ამას საჯაროდ იტყოდა, კოალიციის წევრებთან ეთქვა.

_ თაკო ჩარკვიანმა ჩემთან ინტერვიუში თქვა, რომ ეს საკითხი ჯერ კოალიციაში გააჟღერა და თან ისიც თქვა, რომ ერთ-ერთ ვარიანტად დაასახელა და არა უალტერნატივოდ…

_ ჩვენ ვინმეს პირს კი არ ვუკერავთ. უნდოდა, რომ საჯაროდ გაეკეთებინა ეს განცხადება და გააკეთა.

_ სხვა რამე ვიკითხე, ისაუბრა თუ არა გუნდში მან, სანამ იდეას გააჟღერებდა?

_ ჩვენთან არ უსაუბრია ქალბატონ თაკოს. უცნაურად არ გეჩვენებათ, რომ ამხელა წონის პარტიასთან ეს საკითხი წინასწარ არ მოთელა და არ შეათანხმა?! ჩვენ ხომ ერთმანეთს ველაპარაკებით?! უამრავი იდეა იხილება, რომელზეც ვმსჯელობთ, ვკამათობთ, შეიძლება ხანდახან მეგობრულადაც კი ვიჩხუბოთ. ერთმანეთს ტელევიზორიდან ხომ არ ველაპარაკებით? პარტნიორობა ეს არის.

_ მან თქვა, რომ „ძალა ერთობაშია“-ს ფორმატში განიხილა ეს საკითხი, რომლის წევრებიც „ნაციონალური მოძრაობაც“ ხართ…

_ მოდით, სიტყვებით თამაში არ გვინდა. ამ ფორმატში შეხვედრას „ნაციონალური მოძრაობა“ არ ესწრებოდა, ეს თქვენ ხომ იცით?

_ რატომ?

_ იმიტომ, რომ წინასწარ ვიცოდით, რომ ამ საკითხის წამოწევას აპირებდა ქალბატონი თაკო და წინასწარ ვუთხარით, რომ ეს არ გაეკეთებინა. ეს ხომ იცით, რომ არ ესწრებოდა „ნაციონალური მოძრაობა“.

_ არა, ეს დეტალი ნამდვილად არ ვიცოდი.

_ როგორ არ იცით? როცა ეს ინფორმაცია გაჟღერდა, მაშინვე გაჟღერდა ესეც, რომ ამ სხდომაზე „ნაციონალური მოძრაობა“ არ იყო. ეს არის მთავარი დეტალი. ხომ ფაქტია, რომ როგორც მინიმუმ ამ კოალიციაში „ნაციონალურ მოძრაობას“ 90%-იანი წონა მაინც აქვს?! როგორ შეიძლება სანამ ტელევიზიით გამოხვალ, ეს არ განიხილო მასთან? მან თქვა ის აზრი, რაც წინასწარ იყო გიორგი ვაშაძესთან შეთანხმებული. ჩვენი საქმეა, რომ ჩვენი პოზიცია ვთქვათ, ჩვენ არავის არ ვუბრაზდებით და პირს არ ვუკეტავთ. ყველას შეუძლია აზრი გამოთქვას, მაგრამ ჩვენ რატომ გვსაყვედურობს ვინმე, რომ ჩვენი აზრი გამოვთქვათ?!

სხვებს შეურაცხყოფას არ ვაყენებ, ჩვენს თავზე ვლაპარაკობ – „ნაციონალური მოძრაობის“ მხრიდან თანამდებობებზე ახლა ლაპარაკი უზნეობად მიგვაჩნია. აბსოლუტურად მიუღებლად მიგვაჩნია რაიმე თანამდებობებზე და სკამებზე საუბარი. საპარლამენტო სიაზეც კი არ დაგვიწყია მსჯელობა. იმიტომ, რომ სულ სხვა ხარისხის სიმძიმის ამოცანები დგას საზოგადოების წინაშე.

კარგი და გონივრული პარტია საზოგადოების საჭიროებებზე რეაგირებს. ჩვენ ამისთვის არ გვცხელა, ჩვენ გვინდა, რომ იქნება რამე გამოვგლიჯოთ ამ ხელისუფლებას, რომ ადამიანს 1000 ლარი მისცეს ხელისუფლებამ, ხოლო ყველა ბავშვს და მოზარდს, 18 წლამდე პირებს – 500 ლარი. გარდა იმ ოჯახებისა, რომელთა წლიური შემოსავალიც აღემატება 40 000 ლარს. ეს ჯდება 3 მილიარდი ლარი, ხელისუფლებამ თქვა, რომ 3 მილიარდი დოლარი, ანუ 10 მილიარდი ლარი იშოვა. კი ბატონო რაღაცა საბანკო სექტორის გაძლიერებას დასჭირდება, რაღაცები ეკონომიკის სხვა დარგების სტიმულირებას და ა. შ.

_ თემას დავუბრუნდეთ. ამ საკითხებზე სხვა ინტერვიუში ვისაუბროთ…

_ ამას ვამბობ, რომ ამ საკითხებზე ვიბრძვით ახლა და არა პრემიერ-მინისტრობის კანდიდატზე. მით უმეტეს 2 %-იანი პარტიის ლიდერის გაპრემიერებაზე. ძალიან არასერიოზულია ეს ყველაფერი. ჩვენმა პარტიამ რომ ამაზე იმსჯელოს ახლა, ეს საერთოდ უზნეობად მიმაჩნია.

_ მიუხედავად იმისა, რომ გიორგი ვაშაძემ სერიოზული შეცდომა დაუშვა და მისადმი ჩვენ ნდობას პრობლემა შეუქმნა, ამის მიუხედავად ჩვენ არ ვაპირებთ კიდევ უფრო მკვეთრი ნაბიჯების გადადგმას, გარდა იმ განცხადებისა, რაც ზაალ უდუმაშვილმა „ნაციონალური მოძრაობის“ სახელით გააკეთა. ვაპირებთ გავაგრძელოთ თანამშრომლობა ისე, როგორც ვიყავით – კოალიცია „ძალა ერთობაშია“-ს წევრებთან შეთანხმებულად. არც ნაკლები და არც მეტი. ნურავის ნუ გაუჩნდება არაადეკვატური და ზედმეტი ამბიციები, მით უმეტეს უდროო ამბიციები. ეს გაითვალისწინოს ყველამ.

_ ისე პარტიაში არ გიფიქრიათ იმაზე, ვინ შეიძლება იყოს პრემიერობის თქვენი კანდიდატი? არ დამისახელოთ კონკრეტული გვარი, მხოლოდ ფაქტზე მიპასუხეთ.

_ ნამდვილად არ გვიფიქრია ამაზე. მოსაზრებები რა თქმა უნდა ყველას გვაქვს. ადამიანს უამრავი აზრი გვიტრიალებს თავში. გინდა, რომ ივანიშვილი დაამარცხო. უნდა იფიქრო ყველაფერზე წინმსწრებად, მაგრამ მსჯელობა მაშინ ექნება აზრი, როდესაც მეტ-ნაკლებად ადეკვატური იქნება ეს. დღეს სხვა საკითხებზე ვმსჯელობთ, რაზეც უკვე ვისაუბრეთ.

ავტორი: იაგო ნაცვლიშვილი

Comments
Loading...