რა გავაკეთოთ, როცა არაფრის კეთება არ გვინდა — 7 რჩევა

დროდადრო ნებისმიერი ჩვენგანი განიცდის მოტივაციის ნაკლებობას. ასეთ დღეებში შესაძლოა, დაღლილობასა და გაღიზიანებას გრძნობდე ან უბრალოდ ვეღარ იღებდე სიამოვნებას იმისგან, რაც, ჩვეულებრივ, გხიბლავს და გაინტერესებს.

დროგამოშვებით მსგავსი გრძნობების ქონა ნორმალურია. ეს შეიძლება იმის ნიშანი იყოს, რომ სტრესში ხარ ან შენთვის უჩვეულო სიტუაციასთან გიწევს გამკლავება. ეს გრძნობები დროებითია და უმეტესად, სერიოზულ პრობლემას არ წარმოადგენს. ხანდახან ეს უბრალოდ იმის ნიშანია, რომ შენს გონებასა თუ სხეულს განტვირთვა სჭირდება.

თუმცა, ზოგიერთ შემთხვევაში, მსგავსი გრძნობები შესაძლოა უფრო სერიოზული პრობლემის, მაგალითად დეპრესიის ან სხვა დარღვევის ნიშანი იყოს. თუ ისეთი რაღაცების მიმართ დაკარგე ინტერესი, რომელიც სხვა დროს სიამოვნებას განიჭებდა ან ზოგადად ცხოვრების შესახებ აპათიის გრძნობა ორ კვირაზე დიდხანს გრძელდება, უმჯობესია, პროფესიონალს მიმართო.

იმ შემთხვევაში, თუ მსგავსი გრძნობები მხოლოდ დროებითია, არსებობს გარკვეული გზები, რომლებიც განწყობის გამოსწორებასა და მოტივაციის დაბრუნებაში დაგეხმარება.

ფოტო: Lilla Bardenova / Dribbble

1. შეისვენე

ის, რომ არაფრის კეთების სურვილი არ გაქვს, შესაძლოა იმის ნიშანი იყოს, რომ გადაღლილი და გადამწვარი ხარ. ხანდახან შესვენება და საკუთარ თავზე ზრუნვა საუკეთესო გზაა. ამაში საკუთარი თავისთვის მენტალური ჯანმრთელობის დღის მოწყობა დაგეხმარება. ასეთ დროს, უნდა ეცადო, გათავისუფლდე იმ მოლოდინებისგან, რომელიც საკუთარი თავის მიმართ გაქვს. ამის მაგივრად, უმჯობესია, ის გააკეთო, რაც თავს უკეთ გაგრძნობინებს და ენერგიითაც აგავსებს. შეგიძლია, ფუმფულა სავარძელში საყვარელ წიგნთან ერთად მოკალათდე. ხშირად, ყველაზე ელემენტარული დეტალებიც კი თავს უკეთესად გაგრძნობინებს, მაგალითად, შხაპის მიღება, წყლის დალევა, მსუბუქი ვარჯიში და ა.შ.

2. იყავი საკუთარი თავის მიმართ კეთილი

საკუთარი თავისადმი თანაგრძნობა გულისხმობს იმის გაცნობიერებას, რომ შენი გამოცდილება ადამიანად ყოფნის განუყოფელი ნაწილია და დადებითი და უარყოფითი ემოციები სრულიად ბუნებრივია. საკუთარი თავისადმი თანაგრძნობა ნეგატიური ემოციების, სტრესისა და შფოთვის შემცირებას ემსახურება, ამიტომ თუ არაფრის კეთების თავი არ გაქვს, სცადე, საკუთარ თავს კეთილად მოეპყრა. მიეცი დრო საკუთარ თავს და მიიღე იგი.

შენ მნიშვნელოვანი ხარ — 10 უსაყვარლესი კომიქსი მენტალური ჯანმრთელობის შესახებ

3. გაისერინე

გასეირნება დროის გარეთ გატარებასა და ვარჯიშს აერთიანებს. ფიზიკური აქტივობა კი დეპრესიის სიმპტომების პრევენციისა და მათი მკურნალობისთვის ეფექტური მეთოდია. გარეთ ყოფნა მენტალურ მდგომარეობაზე დადებითად აისახება. 2019 წელს ჩატარებულმა კვლევამ აჩვენა, რომ ბუნებასთან ახლოს ყოფნა საერთო კეთილდღეობას, გაუმჯობესებულ განწყობას, პოზიტიურ სოციალურ ინტერაქციებსა და ბედნიერებას იწვევს. ამიტომ თუ ცუდ განწყობაზე ხან არ მოტივაციის ნაკლებობას განიცდი, გასეირნება შენი მენტალური კეთილდღეობისთვის, შესაძლოა, მშვენიერი ხერხი აღმოჩნდეს.

ფოტო: Marina Vishtak / Dribbble

4. გაესაუბრე ვინმეს

როდესაც თავს ცუდად გრძნობ, შესაძლოა, სხვასთან საუბარი დაგეხმაროს. ვის შეგიძლია გაესაუბრო შენი გრძნობების შესახებ? იფიქრე, ვინ შეიძლება იყოს შენთვის მოტივაციისა და მხარდაჭერის წყარო.

თუ სხვა ადამიანებთან საუბრის განწყობაზე არ ხარ, შესაძლოა, უბრალოდ სახლიდან გასვლა და სხვა, თუნდაც უცხო ადამიანების გარემოცვაში ყოფნაც საინტერესო გამოცდილება იყოს. ესტუმრე რომელიმე ლამაზ კაფეს, მადლობა გადაუხადე სუპერმარკეტში გამყიდველს, მიესალმე და მოიკითხე შენი მეზობელი. მცირე, თუმცა დადებითი ინტერაქციები შენს განწყობაზეც კარგად აისახება.

5. დაიწყე პატარა ნაბიჯებით

როდესაც რაღაცის გასაკეთებლად ენერგიასა და მოტივაციას ვეძებთ, დაწყება ყველაზე რთული ეტაპია. ასეთ დროს პატარა ნაბიჯის გადადგმა საუკეთესო გამოსავალია. იმის მაგივრად, რომ გასაკეთებელი საქმეების სიას შენი დასტრესვის საშუალება მისცე, აირჩიე პატარა, უმნიშვნელო საქმე და გააკეთე ის. ასეთი შეიძლება იყოს ჭურჭლის გარეცხვა, საწოლის გასწორება, გარეცხილი ტანსაცმლის დაკეცვა, ერთ შეტყობინებაზე პასუხის გაცემა, შეხვედრის ჩანიშვნა, გადასახადის გადახდა და ა.შ.

ხანდახან ყველაზე მარტივი საქმეებიც კი სტრესულია, როდესაც ჩვენს სიაში მათი რაოდენობა მუდმივად იზრდება. ერთი მცირე საქმის მოგვარება თავდაჯერებით, მოტივაციითა და ენერგიით აგავსებს. თუ მხოლოდ ერთს დასჯერდები, არც ეგაა ტრაგედია. გახსოვდეს, რომ შენს თავს კარგად ყოფნისა და დასვენების უფლება აუცილებლად უნდა მისცე.

6. დაგეგმე

თუ ამჟამად მუშაობის მოტივაცია არ გაქვს, ის იმას სულაც არ ნიშნავს, რომ მომავლის გეგმების დაწყობაც არ შეგიძლია. ერთ-ერთი კვლევის მიხედვით, იმ მიზნებისა და შედეგების ვიზუალიზაცია, რომელთა მიღწევაც გინდა, მოტივაციის ამაღლებას უწყობს ხელს.

კონკრეტული გეგმების დაწყობამ, შესაძლოა, სასიამოვნო მოლოდინით აგავსოს და შენს განწყობაზეც დადებითად იმოქმედოს.

ფოტო: Anjalee Wegodapola / Dribbble

7. დაწერე

როცა რთულ ემოციებთან გიწევს გამკლავება, ხანდახან მათ შესახებ დაწერა შესაძლოა, საუკეთესო გზა იყოს. წერა მენტალურ კეთილდღეობაზე დადებით გავლენას ახდენს. ეს აქტივობა დეპრესიისა და შფოთვის სიმპტომებსაც ამცირებს. წერა, დამატებით, საკუთარ თავსა და გრძნობებში გარკვევის მშვენიერი შესაძლებლობაცაა.

ან იპოვე შენთვის საუკეთესო გზა

რადგანაც თითოეული ადამიანი ინდივიდუალურია, უმოტივაციობასა და დაღლილობას ყველა განსხვავებულად უმკლავდება. თუ ზემოთ ჩამოთვლილი ხერხები შენთვის საკმარისი ან ეფექტური არაა, იპოვე ის, რაც შენს ინტერესებსა და სურვილებს შეესაბამება. ასეთი შეიძლება იყოს გემრიელი კერძის მომზადება, მუსიკის მოსმენა, მედიტაცია, ხატვა და ა.შ.

გახსოვდეს, რომ თუ აპათიის გრძნობა და არაფრის კეთების სურვილი დროებითი არაა, ეს შეიძლება, დეპრესიის ნიშანი იყოს. დეპრესიაზე, აგრეთვე, შეიძლება მიუთითებდეს უიმედობა, კვებისა და ძილის რუტინის დარღვევა, მუდმივად ცუდ განწყობაზე ყოფნა და ა.შ. ასეთ დროს, უმჯობესია, დახმარებისთვის კომპეტენტურ პირს მიმართოთ.

 

 

წყარო: On.ge

Comments
Loading...