13 დღიანი ძებნის შემდეგ თელავში დაკარგული მამაკაცი გარდაცვლილი იპოვეს

„დათო გარდაცვლილი ნახეს ტურბაზის ტყეში, საიდანაც გზა ჯვარპატიოსნის ტაძრისკენ მიდის. თავის ქვეშ საკუთარი სამხედრო ქურთუკი ჰქონდა ამოდებული“, – განაცხადა გარდაცვლილის ძმამ ვეფხო ხოკერაშვილმა.

თელავში დაკარგული 57 წლის მამაკაცი 13-დღიანი ძებნის შემდეგ გარდაცვლილი იპოვეს. როგორც გარდაცვლილის მეზობლები აცხადებენ, დავით ხოკერაშვილის კვალს თელავის ჯვარპატიოსნის სახელობის ტაძრისკენ მიმავალ გზაზე მიაგნეს. ცხედრის პოვნამდე იპოვეს ის ღორიც, რომლის საძებნელადაც დავით ხოკერაშვილი ტყეში წავიდა.

დავით ხოკერაშვილი ქალაქ თელავში ცხოვრობდა. გავრცელებული ინფორმაციით, ის 25 იანვარს დაკარგული ღორის საძებნელად სახლიდან ცივის მთის მიმართულებით წავიდა და მას შემდეგ მისი კვალი გაუჩინარდა. სამძებრო სამუშაოებში ჩართული იყო საგანგებო სიტუაციების მართვის სამსახური, პოლიცია და მონადირეთა 15-კაციანი ჯგუფი.

როგორც შინაგან საქმეთა სამინისტროში აცხადებენ, გამოძიება საქართველოს სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.

Comments
Loading...