ერთ-ერთი დაკავებულის დედა : დათა, ბექას სულ არიგებდა

თბილისში მომხდარ სასტიკ მკვლელობაში ბრალდებულების საქმესთან დაკავშირებით, „კვირასთვის“ ახალი დამატებითი დეტალები გახდა ცნობილი. ლუბა ყოჩიაშვილის მკვლელობის საქმეზე ერთ-ერთი ბრალდებული ბექა შენგელია წარსულში ნასამართლევია და მან სასჯელაღსრულების დაწესებულება დაახლოებით, ორი წლის წინ დატოვა.

ბექა შენგელია სკოლის დამთავრების შემდეგ დააკავეს და დაახლოებით ორი წლის წინ გათავისუფლდა.

საქმეში კიდევ ერთი ბრალდებული – დათა კვარაცხელია, რომელსაც დანაშაულის დაფარვა და შეუტყობინებლობა ბრალდება, ბექა შენგელიას მამიდაშვილია. ბექა შენგელია და დათა კვარაცხელია ბიძაშვილ-მამიდაშვილები არიან. „კვირასთვის“ ცნობილი გახდა, რომ დათა კვარაცხელია დანაშაულის ჩადენის დღეს, 19 ოქტომბერს, წალენჯიხის რაიონის სოფელ ჯგალში იმყოფებოდა და თბილისში 25 ოქტომბერს ჩამოვიდა. 23 წლის დათა, დავით კვარაცხელიასა და ნანა შენგელიას უფროსი შვილია. მათ კიდევ ორი შვილი ჰყავთ.
აღსანიშნავია, რომ ბრალდებულის მამა დავით კვარაცხელია წლების განმავლობაში საზღვარგარეთ მუშაობდა. შვილის დაკავების ინფორმაცია ბელგიაში შეიტყო და საქართველოში ჩამოვიდა.
დათა კვარაცხელიამ ბავშვობა სოფელ ჯგალში გაატარა. სკოლაც ამავე სოფელში დაამთავრა. ამის შემდეგ, მან სწავლა თბილისში, ხარისხის მართვის საზოგადოებრივ კოლეჯში გააგრძელა. პროფესიად სტომატოლოგია აირჩია.
„ჩემი შვილი სოფელში იყო, 25 ოქტომბერს ჩამოვიდა. მე, თბილისში, საკონდიტრო საცხობში ვმუშაობ. ჩემი ცვლა 3 საათზე დასრულდა. სახლში რომ მივედი, დათა სახლში დამხვდა. მამიდასთან აპირებდა წასვლას. სახლიდან გავიდა. 3 საათის შემდეგ დამირეკეს და მითხრეს, რომ ჩემი შვილი დაკავებულია. ამის შემდეგ დათა აღარ მინახავს. უწესიერესი შვილი მყავს. ძალიან პატიოსანი. სკოლაში ერთ-ერთი წარმატებული მოსწავლე იყო. სკოლის ქორეოგრაფიულ ანსამბლში ცეკვავდა. თავის ბიძაშვილს ბექას, სულ არიგებდა. ჩემს შვილს მისი ჩაცმულობა და მანერები არ მოსწონდა”, – ამბობს ნანა შენგელია.
ნანა შენგელია „კვირასთან“ წარსულს იხსენებს. ამბობს, რომ მისი ძმა და რძალი წლების წინ დაშორდნენ. მათ ორი შვილი ჰყავთ.
„როდესაც, ჩემი ძმა მეუღლეს დაშორდა, საქართველოდან წავიდა. ახლაც არ ვიცი, სად არის უკრაინაში თუ რუსეთში. 10 წელია ჩემი ძმა არ მინახავს. მე-6 კლასამდე ბექას და მის ძმას მე ვზრდიდი, მერე დედამ თბილისში წამოიყვანა. ჩვენ ურთიერთობა აღარ გვქონია. ბექა სკოლის დასრულების შემდეგ დააკავეს და ციხეში იჯდა. პროცესს არც კი დავსწრებივარ. ის დაახლოებით ორი წლის წინ გათავისუფლდა. დათას და ბექას ურთიერთობა, ციხიდან გამოსვლის შემდეგ აღდგა. ბექა 2 წლის წინ გამოჩნდა. ჩემი დათა ბექას, სულ არიგებდა. არ მოსწონდა მისი ჩაცმულობა, არც მისი მეგობრები. ისინი ბიძაშვილ-მამიდაშვილები არიან. ბექა, ციხიდან გამოსვლის შემდეგ, სტილისტის პროფესიას დაეუფლა და მუშაობდა კიდეც. დათას ჩემთვის არაფერი უთქვამს. რა ვთქვა? ან როგორ დავიჯერო ის ყველაფერი, რაც ჩემს თავს ხდება? ჩემს შვილზე რაც გინდათ მკითხეთ, თუნდაც სოფელში ჩადით და იკითხეთ დათა კვარაცხელია. დანაშაულის შეუტყობინებლობის გამო დააკავეს. არ ვიცი, რა ეშველება ჩემს შვილს,“ – ამბობს ნანა შენგელია.
„კვირა“ სოფელ ჯგალის სკოლის დირექტორს ნონა კვარაცხელიას გაესაუბრა. დირექტორმა ყოფილი მოსწავლე დავით კვარაცხელია დადებითად დაახასიათა.
„ერთ-ერთი საუკეთესო მოსწავლე იყო. ცეკვავდა. სკოლას ყოველთვის ასახელებდა. ბრწყინვალე მოსწავლე იყო. სწავლის დასრულების შემდეგ თბილისში წავიდა, სტომატოლოგიურზე ჩააბარა. ერთ-ერთი საუკეთესო ოჯახია. დათას პატარა ძმა დღემდე სკოლაში სწავლობს. ბებია საბავშვო ბაღის აღმზრდელია,“ – ამბობს „კვირასთან“ საუბრისას წალენჯიხის რაიონის სოფელ ჯგალის სკოლის დირექტორი ნონა კვარაცხელია.
„კვირა“ სოფელ ჯგალში, დათა კვარაცხელიას ბებიას, საბავშვო ბაღის აღმზრდელს ზოია კვარაცხელიას დაუკავშირდა, რომელმაც შვილიშვილის დაკავების შესახებ ინფორმაცია ტელევიზიიდან შეიტყო. ბებია მომხდარით შოკირებულია. ამბობს, რომ მომხდარის შესახებ არ სჯერა.
„ჩემი შვილიშვილი აქ მყავდა. 25 -ში წავიდა თბილისში. რატომ წავიდა, არ ვიცი, მაგას მე ვინ მეტყვის. დათა სულ არიგებდა მის ბიძაშვილს, ბექას. არ მოსწონდა მისი საყურეები და ჩაცმულობა. უნდოდა წესიერად ეცხოვრა, მაგრამ ბექა არ ემორჩილებოდა. დათა სულ სხვანაირი ბიჭია. როგორ მოხვდა ციხეში. დღეს გავიგე ეს ამბავი, გუშინ ტელევიზიას გადმოუცია. ისეთი შვილიშვილი მყავს, სულ ფეხით ჩამოვალთ მთელი სოფელი და ყველას მოვუყვებით დათას შესახებ,“ – ამბობს კვირასთან ბრალდებულ დათა კვარაცხელიას ბებია.
„კვირა“ დანაშაულის დაფარვასა და დანაშაულის შეუტყობინებლობაში ბრალდებულის დათა კვარაცხელიას ადვოკატს დაუკავშირდა. ადვოკატი საქალაქო სასამართლოს გუშინდელ გადაწყვეტილებას ხვალ, 8 ნოემბერს, საქალაქო სასამართლოში გაასაჩივრებს და სარჩელი შეაქვს.
„ჩემი დაცვის ქვეშ მყოფ დათა კვარაცხელიას ბრალი კი აქვს წარდგენილი დანაშაულის დაფარვასა და შეუტყობინებლობაში, თუმცა, საქმის მასალებში ამის არანაირი მტკიცებულება არ არსებობს. საქმის მასალებში არის ერთი პატარა დეტალი. ერთ-ერთი ბრალდებულის ჩვენების თანახმად, მან დათა კვარაცხელია გაიცნო და მომხდარის შესახებ იმავე დღეს მოუყვა, რაც საეჭვო გარემოებაა, რადგან როგორ შეიძლება ახალგაცნობილ, შენთვის უცნობ პიროვნებას ასეთი დანაშაულის შესახებ უამბო. ჩვენ ამას გავასაჩივრებთ ხვალ. დათა დუმილის უფლებას იყენებს. მას რამდენჯერმე უკვე შევხვდი და წაყენებულ ბრალდებას არ აღიარებს“, – ამბობს ადვოკატი ნიკა სადრაძე.
მისივე თქმით, დათა კვარაცხელია და ბექა შენგელია სამართალდამცავებმა ერთად დააკავეს, ისინი მარჯანიშვილის მოედანზე ერთ-ერთ კაფეში ისხდნენ.
შეგახსენებთ, რომ ასაკოვანი დედა 18 წლის გოგონამ მეგობრებთან ერთად მოკლა. ფაქტთან დაკავშირებით სულ 5 პირია დაკავებული.
„გამოძიებამ დაადგინა, რომ სამმა ბრალდებულმა, მიმდინარე წლის 19 ოქტომბერს, წინასწარ შემუშავებული დანაშაულებრივი გეგმის მიხედვით, რასაც წინ უძღოდა დედა-შვილის ირმა ყ.-სა და ლუბა ყ.-ს შორის წარმოქმნილი უთანხმოება და დაპირისპირება, თბილისში, ბერი გაბრიელ სალოსის ქუჩაზე მდებარე კორპუსის საცხოვრებელ ბინაში, ამავე მისამართზე მცხოვრები, ბრალდებულ ირმა ყ.-ს დედა – 1940 წელს დაბადებული ლუბა ყ. ჯერ ელექტროშოკით გათიშეს, ხოლო შემდგომ – გაგუდეს და დანის დარტყმით მოკლეს. ბრალდებულებმა გარდაცვლილი ლუბა ყ.-ს ცხედარი დიდი ზომის ჩანთაში მოათავსეს და თბილისში, ბექა შ.-ს ნაქირავებ ბინაში გადაიტანეს, სადაც გვამი დაანაწევრეს. იმავე საღამოს, დაბინდების შემდეგ, ბრალდებულებმა დანაწევრებული გვამი ორი ჩანთის მეშვეობით გლდანის N8 საპყრობილის მიმდებარედ არსებულ გაუქმებულ ნაგავსაყრელზე გადაიტანეს, წინასწარ, მოცემული დანაშაულის ჩადენის მიზნით შეძენილი ბენზინი გადაასხეს, ცეცხლი წაუკიდეს და კვალის დასაფარად, თხრილში დაწვეს. გამოძიებით დადგინდა, რომ ეს იყო რიტუალური მკვლელობა. აღნიშნულ საქმეზე განზრახ დამამძიმებელ გარემოებაში მკვლელობისთვის დაკავებულ ბრალდებულთაგან ორი ჩადენილ დანაშაულს აღიარებს. მესამე ბრალდებული, არასრულწლოვანი ნინა ჩ. დუმილის უფლებას იყენებს. გამოძიება დამამძიმებელ გარემოებაში ჯგუფურად ჩადენილი განზრახ მკვლელობის, განზრახ მკვლელობის, დანაშაულის დაფარვისა და დანაშაულის შეუტყობინებლობის ფაქტზე, საქართველოს სისხლის სამართლის კოდექსის 108-ე, 109-ე მუხლის მე-2 ნაწილით, 375-ე და 376-ე მუხლებით მიმდინარეობს”, -აცხადებენ შსს-ში.

Comments
Loading...