“განსაკუთრებით გარყვნილი და ამაზრზენია ტერორიზმი, რომელიც ხორციელდება რელიგიური საფარის ქვეშ”

საქართველოს პრეზიდენტმა გიორგი მარგველაშვილმა და პირველმა ლედიმ მაკა ჩიჩუამ საქართველოს პრეზიდენტის სასახლეში, ტოლერანტობის საერთაშორისო დღესთან დაკავშირებით დიპლომატიურ კორპუსს, სხვადასხვა რელიგიური კონფესიისა და ეთნიკური უმცირესობების წარმომადგენლებს, საერთაშორისო და ადგილობრივ არასამთავრობო ორგანიზაციებს მიღებაზე უმასპინძლეს.

გიორგი მარგველაშვილმა პარიზში, 13 ნოემბერს, ტერორისტული აქტების შედეგად დაღუპულებს წუთიერი დუმილით პატივი მიაგო და სტუმრებს სიტყვით მიმართა.

“ჩვენ, მთელმა კაცობრიობამ ამ დღეებში სწორედ ტოლერანტობის თვალსაზრისით მივიღეთ გამოწვევა. საფრანგეთში მომხდარი ტრაგიკული მოვლენების ფონზე კიდევ უფრო მნიშვნელოვანია, რომ შევძლოთ გაერთიანება და კიდევ ერთხელ ვუპასუხოთ აგრესიას და ტერორს, რომ ვერასოდეს შეგვცვლის ტერორი და არასდროს შეიბღალება ჩვენში ტოლერანტობის სულისკვეთება.

კიდევ ერთხელ მინდა ხაზი გავუსვა იმას, რომ ჩემთვის ტერორიზმი და ვანდალიზმი რელიგიასთან და ისლამთან არ ასოცირდება. მიუხედავად იმისა, რომ არიან ადამიანები, რომლებიც თავს მუსლიმებს უწოდებენ და ტერორის დათესვას ცდილობენ.

ჩემთვის ისლამი არ ასოცირდება იმ საშინელებებთან, რაც დღეს ხდება სირიაში და რაც მოხდა საფრანგეთში.
მსოფლიოს მასშტაბით დაღუპული ნებისმიერი ადამიანი ჩვენთვის ძალიან დიდი დარდის საგანია, მნიშვნელობა არ აქვს სად ხდება ეს – თანამედროვე დასავლურ სამყაროში, თუ აზიის რომელიმე ქვეყანაში. ადამიანის სიცოცხლის ფასი ყველგან ერთნაირია და ყველგან საშინელია, როდესაც ჩვენ ვხედავთ უდანაშაულო ადამიანების მსხვერპლს.

ტერორიზმი ამაზრზენია, მაგრამ განსაკუთრებით გარყვნილი და ამაზრზენია ტერორიზმი, რომელიც ხორციელდება რელიგიური საფარის ქვეშ, რადგან ამ შემთხვევაში, ტერორისტები არამხოლოდ ადამიანის სიცოცხლეს ხელყოფენ, არამედ ისინი ხელყოფენ ჰუმანიზმის იმ საფუძვლებს, რომელიც ჩადებულია ისლამშიც, ქრისტიანობაშიც, იუდაიზმშიც და ყველა სხვა რელიგიაში.

ჩვენ ვცხოვრობთ ქვეყანაში, რომელსაც განსხვავებულის მიმღებლობის გრძელი და ამაყი ისტორია აქვს. ჩვენ, ქართველები ვამაყობთ იმით, რომ შევძელით და ისტორიის განმავლობაში მრავალი რელიგიის და მრავალი ეთნოსის თანაცხოვრების პრეცედენტები შევქმენით.

დღეს, ჩვენი წინაპრების ამ მაგალითს ვუზიარებთ მთელ მსოფლიოს, როდესაც კაცობრიობას კიდევ ერთხელ აქვს მიღებული გამოწვევა იმ ადამიანებისაგან, რომლებსაც სხვისი სიცოცხლის ფასად საკუთარი ძალაუფლების გაძლიერება და განმტკიცება სურს.

მინდა კიდევ ერთხელ გამოვხატო ჩემი და ქართული საზოგადოების გულისტკივილი იმასთან დაკავშირებით, რაც მოხდა პარიზში.

ჩემთვის, როგორც იმ ქვეყნის პრეზიდენტისათვის, რომლის შეიარაღებული ძალებიც მსოფლიოს მასშტაბით გლობალური უსაფრთხოების უზრუნველსაყოფად ტერორიზმის წინააღმდეგ ქმედით ბრძოლას ახორციელებენ, ფასეულია თითოეული ადამიანის სოცოცხლე.

ხაზს ვუსვამ, რომ საქართველო იყო, რჩება და მომავალშიც იქნება ყველა კონფესიის ადამიანისათვის ადგილი, სადაც ისინი საკუთარი რელიგიის, შეხედულებებისა და რწმენის სრული მასშტაბით განხორციელებას შესძლებენ.
ჩვენ მათ იმგვარ მშვიდობიან გარემოს შევუქმნით, როგორსაც ჩვენი წინაპრები საუკუნეების განმავლობაში უქმნიდნენ. ამის გარანტია არის ქართული კულტურა, ამის გარანტია არის ქართული საზოგადოება!

მე მინდა, დღეს, კიდევ ერთხელ გაგახსენოთ ჩვენი კონსტიტუციით დაცული კონფესიის – მართლმადიდებლური ეკლესიის პატრიარქის განცხადება, რომელმაც ძალიან ნათლად, მთელ საზოგადოებას აჩვენა და უთხრა იმის შესახებ, რომ საქართველოში არცერთი რელიგიური კონფესია და არცერთი ადამიანი არასდროს გააიგივებს აგრესიას სხვა რელიგიასთან.

მსურს მადლობა გადავუხადო ომბუდსმენთან არსებულ რელიგიის საბჭოს ჩემი მოკრძალებული ღვაწლის ხაზგასმისათვის და იმ ჯილდოსთვის, რომელიც წელს გადმომეცა.

ამ მძიმე წუთებშიც, როდესაც ყველა შეძრული ვართ პარიზში მომხდარი ტერაქტით ჩვენ ვიყავით, ვართ და ვრჩებით იმ ქვეყნად, რომლისთვისაც ტოლერანტობა იქნება ერთ–ერთი მთავარი ღირებულება”, -აღნიშნა საქართველოს პრეზიდენტმა.

ამერიკის ელჩის იან კელის განცხადებით, დღევანდელი დღე კიდევ ერთხელ გვახსენებს, იმას, რომ საქართველოს ძლიერება სწორედ მისი მრავალფეროვნებიდან მოდის.

„ტოლერანტობამ და სხვადასხვა ეთნიკური და რელიგიური კონფესიების წარმომადგენლების წვლილმა, საქართველო მსოფლიოსა და რეგიონისათვის მისაბაძ მაგალითად აქცია.

ვფიქრობ, ტოლერანტობის საერთაშორისო დღე, არის შესაძლებლობა ვიფიქროთ როგორ შეგვიძლია გავაუმჯობესოთ და ხელი შევუწყოთ ტოლერანტობას და ვაღიაროთ მსოფლიო საზოგადოებისა და საქართველოს პროგრესი – იპოვო ძალა მრავალფეროვნებაში, ასწავლო ყოვლისმომცველი ღირებულებები და ხელი შეუწყო ყველა მოქალაქისათვის უფრო სამართლიანი და თანასწორი საზოგადოების ჩამოყალიბებას”, – განაცხადა ამერიკის ელჩმა მიღებაზე.

ღონისძიებაზე მოწვეულმა სტუმრებმა ქართველი ფოტოხელოვანების – ლევან ხერხეულიძის, ნათელა გრიგალაშვილის, სერგო ფიდანიანის, შაჰ აივაზოვის, არჩილ ქიქოძის, თამარ ბოკუჩავას, გიორგი ცაგარელის, დარო სულაკაურის, თემო ბარძიმაშვილის, ნიკო ტარიელაშვილის, გოგიტა ბუხაიძის ნამუშევრების გამოფენა – „საქართველოს რელიგიური და ეთნიკური მრავალფეროვნება” დაათვალიერეს.

გამოფენა საქართველოში არსებულ ეთნიკურ და რელიგიურ მრავალფეროვნებას ასახავს და ტოლერანტობისა და მრავალფეროვნების ინსტიტუტისა და ჰოლანდიის საელჩოს მხარდაჭერით მოეწყო.

სტუმრებს სიტყვით მიმართეს ასევე ჰოლანდიის ელჩმა საქართველოში იოშ დუმამ, ტოლერანტობის და მრავალფეროვნების ინსტიტუტის დამფუძნებელმა ნინო ცინცაძემ, საქართველოს საპატრიარქოს წარმომადგენელმა დეკანოზმა ალექსანდრე გალდავამ, საქართველოს ევანგელურ-ბაპტისტური ეკლესიის ეპისკოპოსმა – მალხაზ სონღულაშვილმა და ეთნიკური უმცირესობის წარმომადგენელმა ლილი საფაროვამ.

Leave A Reply

Your email address will not be published.