ღარიბაშვილი რუსეთთან სავიზო რეჟიმის შესაძლო გაუქმებას ეხმაურება

საქართველოს პრემიერ-მინისტრი ირაკლი ღარიბაშვილი რუსეთთან სავიზო რეჟიმის შესაძლო გაუქმებასთან დაკავშირებით, რუსეთის პრეზიდენტ ვლადიმერ პუტინის დღევანდელ განცხადებას ეხმაურება. ღარიბაშვილის შეფასებით, რუსეთის მხრიდან ეს სწორი მიმართულებით გადადგმული ნაბიჯია. “გავეცანით რუსეთის ფედერაციის პრეზიდენტის დღევანდელ განცხადებას საქართველოს მოქალაქეებისთვის რუსეთთან სავიზო რეჟიმის შესაძლო გაუქმების თაობაზე. ვფიქრობთ, რომ ეს სწორი მიმართულებით გადადგმული ნაბიჯია. მოგეხსენებათ, რომ საქართველოს ხელისუფლებამ ჯერ კიდევ 2011 წელს გააუქმა სავიზო მოთხოვნა რუსეთის მოქალაქეებისათვის. მიმდინარე წელს ჩვენ კიდევ უფრო გავახანგრძლივეთ საქართველოში მათი შესაძლო ყოფნის პერიოდი, რადგან დაინტერესებული ვართ, რომ საქართველოს მეტი ტურისტი ეწვიოს რუსეთიდან და შეძლებისდაგვარად გამარტივდეს ადამიანებს შორის კონტაქტები. გასათვალისწინებელია რუსეთში მცხოვრები ჩვენი მრავალრიცხოვანი თანამემამულეების, ასევე ქართველი ბიზნესმენების და რიგითი მოქალაქეების ინტერესი სავიზო რეჟიმის გამარტივებასთან დაკავშირებით. მათი სურვილია, ორ ქვეყანას შორის მიმოსვლა მინიმალური სირთულეებით ხორციელდებოდეს. მიუხედავად საქართველოსა და რუსეთს შორის არსებული პრინციპული ხასიათის უთანხმოებებისა, მათ შორის 2008 წლის ომის გამომწვევ მიზეზებთან და მის შედეგებთან დაკავშირებით, ბოლო სამი წლის განმავლობაში ჩვენ შევძელით ვაჭრობის, სატრანსპორტო და ჰუმანიტარულ სფეროებში გარკვეული ნაბიჯები გადაგვედგა. მზად ვართ გავაგრძელოთ არჩეული პრაგმატული კურსი რუსეთთან მიმართებაში და რუსეთის მხრიდანაც ველით ანალოგიურ მიდგომას. უახლოეს დღეებში ველით ევროკავშირის გადაწყვეტილებას საქართველოს მოქალაქეებისათვის ვიზალიბერალიზაციის საკითხთან დაკავშირებით, რაც ისტორიული მნიშვნელობის მოვლენა იქნება. ზოგადად, ჩვენი მთავრობის პრინციპული პოზიციაა, რომ საქართველოს მოქალაქეებს უნდა ჰქონდეთ მსოფლიოში თავისუფალი გადაადგილების მაქსიმალური საშუალება. ჩვენი ხელისუფლების გააზრებულ საგარეო პოლიტიკას სერიოზული ხელშესახები შედეგები მოაქვს. სწორედ ასე აღიქვამენ ამას როგორც ჩვენი მოქალაქეები, ასევე დასავლელი პარტნიორები”,-ნათქვამია ირაკლი ღარიბაშვილის განცხადებაში. “ვფიქრობ, მზად ვართ, საქართველოსთან სავიზო რეჟიმი გავაუქმოთ”, – ამის შესახებ რუსეთის პრეზიდენტმა ვლადიმერ პუტინმა ყოველწლიურ პრესკონფერენციაზე ქართველი ჟურნალისტის კითხვაზე საპასუხოდ განაცხადა. მისივე თქმით, საქართველოში ხელისუფლების ცვლილების შემდეგ, გაჩნდა სიგნალები, რომელსაც რუსეთის ხელისუფლება ხედავს. „რაც შეეხება სავიზო რეჟიმის გაუქმებას და ურთიერთობის ნორმალიზებას, საჭიროა სამხრეთ ოსეთის და აფხაზეთის ხელისუფლებასთან თანამშრომლობა. მიუხედავად არსებული სირთულეებისა, ვხედავთ სიგნალებს ხელისუფლებისგან და ეს სიგნალები მიღებულია. ვთანამშრომლობთ ეკონომიკურ, ვაჭრობის სფეროში. რაც შეეხება სავიზო რეჟიმს, ვფიქრობ და მზად ვართ, რომ სავიზო რეჟიმი გავაუქმოთ“, – განაცხადა ვლადიმერ პუტინმა.

Comments
Loading...