გიორგი მარგველაშვილი – პოლიტიკოსებს უნდა გვჯეროდეს კანონის უზენაესობის

პირველ რიგში, პოლიტიკოსებს უნდა გვჯეროდეს კანონის უზენაესობის, – ამის შესახებ საქართველოს პრეზიდენტმა, გიორგი მარგველაშვილმა სასტუმრო “ქორთიარდ მარიოტში” განაცხადა, სადაც საქართველოს უსაფრთხოების და განვითარების ცენტრის ორგანიზებით კონფერენცია მიმდინარეობს, თემაზე: “დემოკრატიული კონტროლი საქართველოს უსაფრთხოების სექტორზე”.
როგორც სიტყვით გამოსვლისას ქვეყნის პირველმა პირმა აღნიშნა, არც ერთ შემთხვევაში არ უნდა მოხდეს კონსტიტუციის პოსტულატებიდან და მუხლებიდან გადახვევა და ყველა პოლიტიკოსი ერთგული უნდა იყოს იმ წესების, რომელიც დადგენილია ჩვენი ძირითადი კანონით.
“პირველ რიგში, თითონ პოლიტიკოსებს უნდა გვჯეროს კანონის უზნაესობის. მეტიც შესაძლოა, გარკვეულწილად ჩანდეს, რომ თითოქოს საჭიროა, რაღაც გადახვევა, თუმცა არც ერთ შემთხვევაში არ უნდა გადავუხვიოთ კონსტიტუციის პოსტულატებს, მუხლებს და უნდა ვიყოთ ბოლომდე ერთგული იმ წესრიგის, რომელიც დადგენილია ჩვენი ძირითადი კანონით. ეს არის უმნიშვნელოვანესი. ქართული სახელმწიფოებრიობის ფუნდამენტია, რომ პოლიტიკური ელიტა თამაშობდეს იმ ძირითადი დაწერილი წესებით, რომელიც ჩვენ ყველამ, როგორც საზოგადოებამ ერთობლივად მივიღეთ. აქ არ არსებობს მომენტი, როცა შეგვიძლია ერთი წამით მაინც ეს დავივიწყოთ”, – განაცხადა მარგველაშვილმა.
პრეზიდენტის განმარტებით, ძალიან მნიშვნელოვანია აღნიშნული ისევე ზედმიწევნით ხორციელდებოდეს შეირაღებულ ძალებთან მიმართებაში, როგორც სხვა შემთხვევაში.
“შესაძლოა, კიდევ უფრო მეტადაც კი იმიტომ, რომ არაფრის დიდებით არ არის დასაშვები წესებიდან და კანონებიდან პატარა გადახვევა მაინც, როდესაც საქმე გვაქვს შეიარაღებულ ძალებთან, ადამიანებთან, ვინც ჩვენს სიამაყეს წარმოადგენს და ვინც ჩვენი საზოგადოების გამო საკუთარ სისხლს ღვრის. ეს არის ის, რაც ჩვენ უნდა განვახორციელოთ ყოველდღიურ ცხოვერებაში”, – აღნიშნა მარგველაშვილმა.

Leave A Reply

Your email address will not be published.