ჯანდაცვის სამინისტროსთან შეკრებილი მოქალაქეები სამინისტროს უმოქმედობას აპროტესტებენ.

„რატომ იმეტებ სიკვდილისთვის“, „ხვალ – გვიანია“, „უპასუხისმგებლობა დანაშაულია“, „სიცოცხლე ადამიანის ხელშეუხებელი უფლებაა“, – ამ შინაარსის პლაკატებით მოქალაქეები ჯანდაცვის სამინისტროს 5 წლის გუგას დახმარებას სთხოვენ, რომელსაც იშვიათი გენეტიკური დაავადება – ადრენოლეიკოდისტროფია (ALD) აქვს. ეს ALD-ს პირველი შემთხვევაა საქართველოში და მის განსაკურნებლად ოპერაცია აქ არ კეთდება.

ALD არის გენეტიკური დაავადება, რომელიც იწვევს თავის ტვინის ნერვული უჯრედების კვდომას ბავშვებში. ვლინდება მეტყველების დარღვევით, ფეხების დამბლით, მგრძნობელობის დაკარგვით და მთვარდება ლეტალურად. დაავადებისგან განკურნების ერთადერთი საშუალება – ღეროვანი უჯრედების გადანერგვაა.

მშობლებმა 5 წლის გუგას საკუთარი ხარჯებით ჩაუტარეს გამოკვლევები, მოიძიეს დონორები და ბავშვი საოპერაციოდ გაამზადეს. ოჯახის ინფორმაციით, გუგა თურქეთშია და ყოველდღე ელოდება ოპერაციის დაწყებას. კლინიკა კი საქართველოს ოფიციალურ პასუხს ელის, დააფინანსებს თუ არა ქვეყანა ოპერაციას და იღებს თუ არა პასუხისმგებლობას ბავშვზე. ექიმები ოპერაციის ჩატარების შემთხვევაში გადარჩენის 100 პროცენტიან გარანტიას იძლევიან.

დღეს აქციის მსვლელობისას გაირკვა, რომ სამინისტრო გუგასთვის მხოლოდ 10 ათასი დოლარის გადახდას შეძლებს, თუმცა ოპერაცია 155 ათას დოლარზე მეტი ღირს.

ოჯახი სამინისტროსგან ითხოვს ან ოპერაციის ანაზღაურების სრულად დაფინანსებას, ან ოფიციალურ წერილს, სადაც გაცხადებული იქნება, რომ სამინისტრო იხსნის ვალდებულებას მისი მოქალაქის წინაშე, რის შემდეგაც ოჯახის წევრთა განცხადებით, ბავშვი მიიღებს სხვა ქვეყნის მოქალაქეობას, რომელიც მას დახმარებას აღმოუჩენს.

Comments
Loading...