კვირიკაშვილმა „მე და საზოგადოების” სკოლებში დანერგვის საკითხს მხარდაჭერა გამოუცხადა

„მინდა, შევეხო რამდენიმე საკითხს, მათ შორის, განათლების პროგრამაში დისციპლინის – „მე და საზოგადოების” შემოღებას და გაუთავებელ თავდასხმებსა და სპეკულაციებს განათლების მინისტრის მიმართ. ჩვენ რამდენიმე დღის წინ მთავრობაში ამ საკითხის განხილვა გვქონდა. დაისვა შეკითხვები, მათ შორის საჯარო სივრციდან წამოსული, თუნდაც ყველაზე კრიტიკული შეკითხვები. აბსოლუტურად ყველა შეკითხვა, რომელიც ჩვენ დავსვით, არის პასუხგაცემული და ამოწურული. მინდა, საჯაროდ განვაცხადო, ის, რომ საწყისი ადრეული ასაკიდანვე ჩვენ ჩვენს თანამოქალაქეებს პასუხისმგებლობის გრძნობა უნდა ვასწავლოთ და განვუვითაროთ, მე მგონი, ამაში დადებითის გარდა არაფერია”, – განაცხადა პრემიერმა.

კვირიკაშვილის თქმით, რისკები ყველაფერში არსებობს, მაგრამ მაქსიმალური მცდელობა უნდა იყოს იქითკენ მიომართული, რომ მათი თავიდან აცილება მოხდეს.

„რისკები ყველაფერში არსებობს და რა თქმა უნდა, ჩვენ მაქსიმალურად უნდა ვეცადოთ, რომ ასეთი რისკები იქნას თავიდან აცილებული. პედაგოგების მომზადებას უდიდესი მნიშვნელობა ექნება, მაგრამ ის, რომ ასეთი რისკები შეიძლება არსებობდეს, არამც და არამც არ ნიშნავს იმას, რომ ასეთი დისციპლინა არ არის საჭირო. მე ვფიქრობ, რომ ამაზე ჩვენ ყველანი ვთანხმდებით და იმ შეხვედრაზე, რომელიც მე ვახსენე, ჩვენ ასეთ შეთანხმებას მივაღწიეთ. ამიტომ მე მინდა, რომ მთელი მთავრობის სახელით მხადაჭერა გამოვუცხადო განათლების მინისტრს. ასევე მინდა, მას მოვუწოდო, რომ მაქსიმალურად იქნას გახსნილი განათლების სამინისტროს კარი ნებისმიერი ასეთი დიალოგისთვის, მაგრამ კიდევ ერთხელ ვამბობ, რომ ის ბრალდებები და ინსინუაციები ფსევდოტრადიციულ ღირებულებებზე, ჩვენთვის აბსოლუტურად მიუღებელია, არანაირი კავშირი ამ საგანსა და ამ სპეკულაციებს შორის არ არსებობს. ჩვენ უნდა გამოვრიცხოთ, თუკი რაიმე ასეთი რისკი შეიძლება იყოს ამ განხილვების პროცესში”
, – განაცხადა კვირიკაშვილმა.

მთავრობის მეთაურის განცხადებით, ნებისმიერი მსგავსი საკითხი მომავალში უპირველეს ყოვლისა, მთავრობაში უნდა იქნას განხილული და მხარდამჭერი განცხადებები გუნდურად უნდა გამოითქვას.

„ნებისმიერი ასეთი საკითხი, რომელიც შესაძლოა მომავალში წამოიჭრას, უპირველეს ყოვლისა, განხილული უნდა იქნას მთავრობაში და შემდეგ უკვე გუნდურად გამოითქვას მხარდამჭერი განცხადებები იმიტომ, რომ ჩვენ არ უნდა შეგვეშინდეს, ვაკეთოთ ის, რაც სწორია და აბსოლუტურად გაბედული ნაბიჯებით განვახორციელოთ ის პროგრამები, რომლებიც ვთვლით, რომ ჩვენი ქვეყნისთვის მნიშვნელოვანია”, – განაცხადა გიორგი კვირიკაშვილმა.

წყარო: reportiori.ge
ნათია ხუციშვილი

Comments
Loading...