ქანთარია – “იმდენი არაფერი გეტკინოს, ვიდრე თქვენ მოხვალთ ხელისუფლებაში და ჩვენ წავალთ”

სერგო, გენაცვალე, იმდენი არაფერი გეტკინოს, ვიდრე თქვენ მოხვალთ ხელისუფლებაში და ჩვენ წავალთ ხელისუფლებიდან, – აღნიშნული განცხადება დეპუტატმა ნუკრი ქანთარიამ პარლამენტის პლენარულ სხდომაზე უმცირესობის წევრის სერგო რატიანის საპასუხოდ გააკეთა.

ქანთარიამ “ნაციონალურ მოძრაობას” მიულოცა, რომ მიხეილ სააკაშვილმა არა მხოლოდ საქართველოს მოქალაქეობა, არამედ პარტიის თავმჯდომარეობაც დატოვა.

“მინდა მოლოცვით დავიწყო მეგობრებო! მინდა გულწრფელად, ყოველგვარი გადაჭარბების გარეშე მივულოცო “ნაციონალურ მოძრაობას”, რომ მათმა ხელმძღვანელმა, ყოფილმა ბელადმა არა მხოლოდ მოქალაქეობა, არამედ “ნაციონალური მოძრაობის” თავმჯდომარის თანამდებობა დატოვა. ამით, რასაკვირველია, გარკვეული თავისუფლება მოგეცათ.

ჩვენ ადრეც ვამბობდით, ძალიან რბილად მინდა ვთქვა, რომ ეს კაცი განსხვავებულ ფსიქიკას წარმოადგენდა, თუმცა თქვენ უფრო ადეკვატური შეფასება მიეცით მას. ასევე ვამბობდით ადრეც, რომ მას არ სჭირდება თანამოაზრეები, სჭირდება მხოლოდ მონები და ამაშიც დაგვიდასტურეთ და ესეც კარგია. იმასაც ვამბობდით, რომ ეს ადამიანი სხვასთან იყო პირმოთნე და თქვენთან ბაქიბუქობდა. კარგია, რომ ამასაც თქვენ ამტკიცებთ. ახლა საჭიროა თავისუფლება გამოიყენოთ კარგად. შეეცადოთ ამ თავისუფლების ხიბლი გაიგოთ, მაგრამ ის, რაც თქვენ წარმოადგინეთ გუშინ რეზოლუციის სახით, აბსოლუტურად გაუგებარია”, – მიმართა “ნაციონალური მოძრაობის” წევრებს ნუკრი ქანთარიამ.

Leave A Reply

Your email address will not be published.