როგორ გამოეხმაურა უცხოური მედია გირჩის სამოქალაქო დაუმორჩილებლობის აქტს

31 დეკემბერს, ღამის 9 საათზე, გირჩის ოფისში პარტიის ლიდერმა და მოხალისეებმა მარიხუანა დათესეს. აღნიშნულზე შსს-მ გამოძიება დაიწყო.

რამდენიმე კვირით ადრე, ზურაბ ჯაფარიძემ მთავრობას ულტიმატუმი წაუყენა და მოსთხოვა, მომხდარიყო ნებისმიერი ნარკოტიკის დეკრიმინალიზაცია და მარიხუანის ლეგალიზაცია.

გთავაზობთ უცხოური მედიის შეფასებებს, გირჩის სამოქალაქო დაუმორჩილებლობის აქტის საპასუხოდ.

openDemocracy – დამოუკიდებელი საერთაშორისო მედია პლატფორმა
პასუხი საქართველოს ომს ნარკოტიკების წინააღმდეგ – ასე ჰქვია სტატიას, რომელშიც გირჩის ინიციატივაა განხილული.

გირჩის ლიდერს, ზურაბ ჯაფარიძეს, სწამს, რომ თუ მარიხუანის ლეგალიზება მოხდება, საქართველოს ეკონომიკა 3 მილიარდი ლარით გაიზრდება, ხოლო ბიუჯეტი 1 მილიარდით.

“ეს თანხა უნდა მოხმარდეს სკოლებში ნარკოტიკების მოხმარების წინააღმდეგ გატარებულ საგანმანათლებლო პროგრამებს და ნარკოდამოკიდებულების სამედიცინო მკურნალობის გაუმჯობესებას” – აცხადებს ჯაფარიძე.

EurasiaNet – კავკასიის, აღმოსავლეთ ევროპის, რუსეთის, შუა აღმოსავლეთის, სამხრეთ-დასავლეთი და ცენტრალური აზიის ამბები
“გირჩის ინიციატივაზე პოლიცია აცხადებს, რომ ისინი კანონის შესაბამისად იმოქმედებენ. თუ ასეა, მათ შესაძლოა ციხეში ადგილის გამოთავისუფლება დასჭირდეთ, რადგან პარტიის საიტზე 500-ზე მეტი ადამიანი აფიქსირებს მზადყოფნას, 31 დეკემბერს მარიხუანა დათესოს” – წერს გამოცემა.

ევრაზიანეტი განიხილავს საქართველოს ნარკოპოლიტიკას და მის მიმართ საზოგადოების კრიტიკას და გირჩის ინიციატივას აფასებს:

“ამ პატარა პარტიამ შეძლო, და საქართველოს ერთ-ერთი მთავარი ეროვნული დებატების შუაგულში მოექცა”.

Cannabis Now – ინგლისურენოვანი ჟურნალი, რომელიც გამოიცემა ინგლისში, ამერიკასა და კანადაში
“მკაცრი აკრძალვები და დაშინებასა და შიშზე აგებული სამართალდამცავთა კულტურა – საბჭოთა ოკუპაციის გავლენა ქართულ ნარკოპოლიტიკაზე. თუმცა აქტივიზმის უპრეცედენტო ტალღა მარიხუანის დეკრიმინალიზაციას რეალურ შესაძლებლობად აქცევს” – წერს ერთ-ერთი პრესტიჟული გამოცემა.

შავი ზღვის სამხრეთ-აღმოსავლეთ სანაპიროზე, დასავლეთ აზიისა და აღმოსავლეთ ევროპის გასაყარზე არსებულ საქართველოში კანაფის რევოლუცია მზადდება.

კანაფის ფლობისა და დისტრიბუციისთვის, სასჯელი 200 დოლარიანი ჯარიმიდან იწყება და 11 წლიან თავისუფლების აღკვეთამდე გრძელდება. სისტემის კრიტიკოსები ამბობენ, რომ მთავრობის აგრესიული ნარკოპოლიტიკა უფრო დიდ ზიანს აყენებს ადამიანებს, ვიდრე თავად კანაფი.

“ჩვენთვის ეს უბრალოდ კანაფისთვის ბრძოლა არაა. ჩვენ თავისუფლების გვწამს, რომელიც სხეულის სრული, 100 პროცენტიანი ფლობით იწყება. ეს ადამიანის უფლებებს ეძღვნება. ჩვენ გვჯერა, რომ მთავრობას არაფერი ესაქმება იმასთან, თუ რას უზამს ესა თუ ის მოქალაქე საკუთარ სხეულს, ჩვენთვის ეს თავისუფლებისთვის ბრძოლაა”.

Voice of America – ინგლისურენოვანი გამოცემა
თბილისში არსებული გირჩის ოფისი 31 დეკემბერს მწვანე სახლად იქცა, 77 ქოთნით, რომელშიც კანაფის მარცვალი იყო დათესილი – წერს ამერიკის ხმა.

“ამის შემდეგ არ ვიცი რა მოხდება. მთავრობას შეუძლია დაგვაიგნოროს, დაგვსაჯოს ან ის ცვლილებები გაატაროს, რომლებსაც ჩვენ მოვითხოვთ” – აცხადებს ზურაბ ჯაფარიძე გამოცემასთან საუბრისას.

გირჩის მხარდამჭერებისთვის, მარიხუანის მოწევა ადამიანის უფლებების ნაწილია, რომელიც საკუთარ სხეულსა და ჯანმრთელობაზე ნებისმიერი გადაწყვეტილების მიღების ნებას გიტოვებს.

ფეისბუკზე გირჩის ოფიციალური გვერდის მიხედვით, 31 დეკემბერს დათესილმა კანაფმა უკვე გაიხარა. On.ge ცდილობს გაარკვიოს, რა ეტაპზეა აღნიშნულ საქმეზე შსს-სში მიმდინარე გამოძიება. ინფორმაციას ამის შესახებ უახლოეს პერიოდში შემოგთავაზებთ.

on.ge

Leave A Reply

Your email address will not be published.