საქართველოში ეკონომიკური რეფორმების განხორციელებას აზიის განვითარების ბანკი მხარს უჭერს

საქართველოში აზიის განვითარების ბანკის მიმდინარე და სამომავლო პროექტები განიხილეს შეხვედრაზე, რომელიც საქართველოს პირველმა ვიცე-პრემიერმა, ფინანსთა მინისტრმა დიმიტრი ქუმსიშვილმა ბანკის აღმასრულებელ დირექტორთან, მეთიუ ფოქსთან გამართა.

ფინანსთა სამინისტროს ინფორმაციით, შეხვედრას, რომელიც აზიის განვითარების ბანკის წლიური 50-ე ფორუმის ფარგლებში გაიმართა, ბანკის ალტერნატიული აღმასრულებელი დირექტორი სქოთ დოუსონი, ფინანსთა მინისტრის მოადგილე ნიკოლოზ გაგუა და რეგიონული განვითარებისა და ინფრასტრუქტურის მინისტრის პირველი მოადგილე ირაკლი მატკავა დაესწრნენ.

უწყების ცნობითვე, შეხვედრაზე საქართველოს პირველმა ვიცე-პრემიერმა, დიმიტრი ქუმსიშვილმა ვრცლად ისაუბრა საქართველოში არსებულ ეკონომიკურ ვითარებასა და დადებით ტენდენციებზე, რომლებიც ქვეყნის ეკონომიკაში მიმდინარეობს. გარდა ამისა, მან ყურადღება გაამახვილა მთავრობის 4-პუნქტიან გეგმასა და იმ რეფორმებზე, რომლებიც ამ გეგმის ფარგლებში ხორციელდება. აქცენტი გაკეთდა აზიის განვითარების ბანკის მხარდაჭერაზე, რომელიც აღნიშნული რეფორმების განხორციელებისაკენაა მიმართული.

როგორც ფინანსთა სამინისტროში აცხადებენ, განსაკუთრებული ყურადღება გამახვილდა სივრცითი განვითარების რეფორმის ფარგლებში, დაგეგმილი საგზაო ინფრასტრუქტურის მშენებლობის პროექტებზე. მათ შორის, აღმოსავლეთ-დასავლეთის ჩქაროსნული ავტომაგისტრალსა და თბილისი-ლარსის გზის პროექტებზე, რომლებიც აზიის განვითარების ბანკის დაფინანსებით განხორციელდება.

ასევე მათი ცნობით, ყურადღება გამახვილდა საბიუჯეტო დახმარების პროგრამაზე, რომელიც მნიშვნელოვანი მხარდაჭერა იქნება მთავრობის 4-პუნქტიანი გეგმის განხორციელების პროცესში.

უწყების ინფორმაციით, შეხვედრაზე ბანკის წარმომადგენლებმა საქართველოს დელეგაციას ეკონომიკური რეფორმების განხორციელების პროცესში სრული მხარდაჭერა აღუთქვეს.

Comments
Loading...