თინა ხიდაშელი: სუსის მეთვალყურეობის ქვეშ მყოფ ადამიანებს შუა ქუჩაში ცეცხლსასროლი იარაღით თავს არ ესხმიან

სუსის მეთვალყურეობის ქვეშ მყოფ ადამიანებს შუა ქუჩაში და შუა დღეზე ცეცხლსასროლი იარაღით თავს არ ესხმიან, – ამ განცხადებით თავდაცვის მინისტრი ტელეკომპანია “პირველის” ეთერში ინგა გრიგოლიას გადაცემაში ალექსი პეტრიაშვილზე თავდასხმასთან დაკავშირებით გააკეთა.

თინა ხიდაშელის იმედოვნებს, რომ სახელმწიფოს მხრიდან დამნაშავეების მიმართ პასუხი მკაცრი და პრინციპული იქნება და ისინი კანონის შესაბამისად უმკაცრესად დაისჯებიან.

“საერთოდ, როდესაც ქუჩაში, დღისით, მზისით ასეთი თავდასხმა ხდება, უკვე ძალიან შემაშფოთებელია. ძალიან დიდი იმედი მაქვს, რომ შინაგან საქმეთა სამინისტრო სწრაფად გასცემს პასუხს ამ სრულიად თავხედურ და ცინიკურ ქმედებას, რომლის მოწმეები ჩვენ ყველა გავხდით. ეს არის პრინციპულად მნიშვნელოვანი, რომ ძალიან სწრაფი და უმკაცრესი იყოს პასუხი თავად ამ დანაშაულის ჩამდენების მიმართ და ასევე ყველა იმ ადამიანის მიმართ, ვისაც შეიძლება ასეთი ტიპის მოქმედებებმა არასწორი აზრები გაუჩინოს, რომ რა მოხდა ახლა, დიდი ამბავი, შუა დღეს იარაღით თუ ირბენ და მკვლელობის მცდელობას განახორციელებ. ეს არის ძალიან მძიმე, მაგრამ საპასუხისმგებლო მისია შინაგან საქმეთა სამინისტროსთვის, რომ მყისიერად მოხდეს ამ ადამიანების პასუხისგებაში მიცემა.

დღევანდელი ფაქტი არის პასუხი თქვენს კითხვაზე, რომ სუსის თვალთვალის ქვეშ მყოფ ადამიანებს შუა ქუჩაში და შუა დღეზე ცეცხლსასროლი იარაღით თავს არ ესმიან, ამიტომ მე ვფიქრობ, რომ ამ ძალიან ტრაგიკულმა შემთხვევამ, რაც დღეს მოხდა, ამ კითხვას პასუხი გასცა”, – განაცხადა თინა ხიდაშელმა.

Comments
Loading...