WiFi-ით აღჭურვილი მიკროავტობუსები თბილისში მარტიდან გამოჩნდება

თბილისელები სამარშრუტო ტაქსებში უფასო Wi-Fi-ით სარგებლობას 4 მარტიდან შეძლებენ.

როგორც “ბიზნესკონტაქტთან” კომპანია WiFisher-ის დამფუძნებელი ნოდარ ივანიძე აცხადებს, პირველ ეტაპზე უფასო ინტერნეტის სისტემით დაახლოებით 14 მიკროავტობუსი აღიჭურვება.

“WiFisher-ი სტარტაპია, რომელიც საქართველოს ბაზრისთვის ინოვაციური სარეკლამო ხაზის შეთავაზების მიზნით, 5 თვის წინ შეიქმნა. სანამ მომხმარებელი ინტერნეტს დაუკავშირდება, ეკრანზე ჩნდება სარეკლამო ბანერი. ეს კარგი შესაძლებლობაა კომპანიებისთვის ინტერნეტით განათავსონ Wi-Fi რეკლამა”, – აცხადებს ნოდარ ივანიძე.

WiFisher-ის დამფუძნებელი ამბობს, რომ კომპანია მოლაპარაკებებს აწარმოებს “სილქნეტთან”, რათა უფასო ინტერნეტით სარგებლობა სკვერებშიც გახდეს შესაძლებელი. მისი თქმით, უკაბელო ინტერნეტის სისტემა ამ დროისთვის თბილისში 70 ადგილას, გუდაურში და ბაკურიანშია განთავსებული. კომპანია აპრილიდან Wi-Fi-ით კუს ტბასაც დაფარავს.

WiFisher-ის დაფუძნებლები მომსახურების დანერგვას უახლოეს პერიოდში ერევანში გეგმავენ. მოლაპარაკებები მიმდინარეობს ასევე ესტონეთთანაც. ნოდარ ივანიძის თქმით, მათი სარეკლამო ხაზი საკმაოდ მოთხოვნადია და კომპანიამ 30 ლოკაციაზე კონტრაქტები უკვე გააფორმა.

Comments
Loading...