ზუგდიდის რაიონულმა სასამართლომ გამგეობიდან გათავისუფლებული თანამშრომლების სარჩელი განიხილა

ზუგდიდის რაიონულმა სასამართლომ დღეს, მუნიციპალიტეტის გამგეობიდან გათავისუფლებული თანამშრომლების მაია ღურწკაიასა და ქეთევან ტაბაღუას სარჩელი განიხილა.

როგორც სასამართლო სხდომის დასრულების შემდეგ მოსარჩელე მხარის ინტერესების დამცველმა, „საერთაშორისო გამჭვირვალობა -საქართველოს“ იურისტმა ლელა მოწონელიძემ განაცხადა, მისი დაცვის ქვეშ მყოფები სამსახურიდან პოლიტიკური ნიშნით გაათავისუფლეს.

“დღევანდელ სასამართლო სხდომაზე ჩემი მოთხოვნა იყო, სასამართლოს ბათილად ეცნო გამგეობის საკონკურსო-საატესტაციო კომისიის გადაწყვეტილება მაია ღურწკაიასა და ქეთევან ტაბაღუას დათხოვნის შესახებ. ასევე, მოვითხოვე მათი სამსახურში აღდგენა და გაცდენილ პერიოდში დაგროვილი ხელფასის, პრემიისა თუ სახელფასო დანამატის ანაზღაურება“, – განაცხადა მოწონელიძემ.

ზუგდიდის გამგეობაში ატესტაცია 17, 18 და 19 ნოემბერს ჩატარდა. ატესტაციის შედეგად, სამსახურიდან 28 თანამშრომელი გაათავისუფლეს.

მორიგი სასამართლო პროცესი 8 თებერვალს ჩაინიშნა.