რუსთაველის გამზირზე 20 ივნისის საქმის ფარგლებში საგამოძიებო მოქმედებებს განაგრძობენ - ადგილზე იმყოფება მაკო გომური. აქციის დაშლის დროს მან თვალი დაკარგა. ის ერთ-ერთია მათ შორის, ვისაც სტრასბურგის სასამართლოში სარჩელი ჰქონდა წარდგენილი.
სწორედ ადამიანის უფლებათა ევროპული სასამართლოს გადაწყვეტილებით და მითითებებით ხსნის პროკურატურა საგამოძიებო მოქმედებების დაწყებას. პარლამენტის შენობასთან მიმდინარე ღონისძიებებმა, მათ შორის, საგამოძიებო ექსპერიმენტებმა, პასუხი უნდა გასცეს კითხვას, რამდენად სწორად დაიგეგმა საპოლიციო ღონისძიებები და ხომ არ იყო ძალის გადამეტების ფაქტები?
"დიდი იმედი არ მაქვს, რომ დამნაშავეებს 6 წლის მერე მიაგნებენ. ძალიან დიდი დრო ჰქონდათ ამისთვის, ჰქონდათ დრო იმისთვის, რომ თვითონ ცხელ კვალზე ემუშავათ და დამნაშავეებისთვის მიეგნოთ. სისტემური დანაშაული იყო და ამ სისტემაში ვინც იყო, თითოეული პირის პასუხისმგებლობა იყო ეს დღე.
რაც შეეხება პასუხისმგებლობებს, მგონია, რომ თანდათან ყველა ადამიანი თავის წილ პასუხს აგებს და დაიწყო უკვე - ადამიანს იბარებენ კომისიაზე და სთხოვენ იმ ფაქტზე პასუხისმგებლობის აღებას, რაც უშუალოდ მისი პასუხისმგებლობა იყო. შესაბამისად, არავის ჰქონდეს იმის იმედი, რომ რაღაციდან ოდესმე დაიძვრენს თავს", - აცხადებს 20 ივნისს დაზარალებული მაკო გომური
