სამტრედიის მუნიციპალიტეტში ინფრასტრუქტურული პროექტები აქტიურად გრძელდება. ამ ეტაპზე, სარეაბილიტაციო სამუშაოები მიმდინარეობს ღანირში, მანჯგალაძეების უბანში, სადაც გზის საფარი იგება.
პროექტი რეგიონული განვითარების ფონდისა და ადგილობრივი ბიუჯეტის დაფინანსებით ხორციელდება.
სამუშაოების მიმდინარეობას ადგილზე გაეცნენ იმერეთში სახელმწიფო რწმუნებულის მოადგილე, ბესიკ გოფოძე, სამტრედიის მერი, დავით ბახტაძე და ზედამხედველობის სამსახურის უფროსი - ამირან თევდორაძე.
მათი განცხადებით, პროექტი გეგმის შესაბამისად მიმდინარეობს და დასრულდება განსაზღვრულ ვადებში.
“გზის რეაბილიტაცია ჩვენი პრიორიტეტია. ამ პროექტის დასრულება მნიშვნელოვნად გააუმჯობესებს ადგილობრივი მოსახლეობის გადაადგილებას და ხელს შეუწყობს რეგიონის განვითარებას",-აღნიშნა სამტრედიის მერმა, დავით ბახტაძემ.
როგორც ადგილობრივები აცხადებენ, გზის პრობლემა წლების განმავლობაში ჰქონდათ და აღნიშნული პროექტის განხორციელებას დადებითად აფასებენ.
“ჩვენს სოფელში კაპიტალური გზა არასდროს ყოფილა. სამტრედიის მერის, ბატონი დავითის დაპირება იყო, რომ გზის პრობლემა დროულად გადაიჭრებოდა და გაკეთდებოდა. მართლაც შეასრულა ამ ადამიანმა მოცემული პირობა და მიმდინარეობს გზის კეთილმოწყობა . გარდა ამისა, სოფელში ბევრი რამ გაკეთდა, რისთვისაც მადლობას ვუხდით ადგილობრივ და ცენტრალურ ხელისუფლებას",- ამბობენ ადგილობრივები.
