საქართველოში აშშ-ის საელჩო, სახელმწიფო დეპარტამენტის წარმომადგენლების პატრიარქთან შეხვედრასთან დაკავშირებით, განცხადებას ავრცელებს. მათი ინფორმაციით, დელეგაციის წევრებმა ხაზგასმით აღნიშნეს აშშ-საქართველოს მეგობრული ურთიერთობები, რომლის ერთ-ერთ მთავარ საფუძვლად საქართველოს ისეთი ღირებულების პატივისცემას მიიჩნევენ, როგორიცაა სარწმუნოება, ოჯახი, ეროვნული იდენტობა და ადამიანის ღირსების უზრუნველყოფა.
საელჩოს ინფორმაციითვე, 27 მაისს საქართველოს საპატრიარქოში გამართული შეხვედრის შესახებ დეპარტამენტის წარმომადგენლების დელეგაციამ განცხადება გაავრცელა.
"შეერთებული შტატების დელეგაციისთვის პატივი იყო თბილისში, საპატრიარქოში სრულიად საქართველოს კათოლიკოს-პატრიარქთან, მის უწმინდესობასა და უნეტარესობასთან, შიო III-სთან შეხვედრა.
დელეგაციამ ხაზი გაუსვა იმ ცივილიზაციურ კავშირებს, რომელიც აშშ-საქართველოს ურთიერთობების საყრდენს წარმოადგენს. შეერთებული შტატები ამ მეგობრობის საფუძვლად მიიჩნევს საქართველოს ფუნდამენტურ ღირებულებებს, მათ შორის: სარწმუნოებას, ოჯახს, ეროვნულ იდენტობასა და ღრმა პატივისცემას ღვთივბოძებული უფლებებისადმი, რომელიც ადამიანის ღირსებას უზრუნველყოფს.
აშშ-ის დელეგაციამ ყურადღება გაამახვილა იმ ქრისტიანულ სათნოებებზე, რომელიც საუკუნეების განმავლობაში გამოარჩევდა ქართულ ცივილიზაციას თანაგრძნობითა და გულმოწყალებით, ასევე, ეკლესიის ისტორიულ მისიაზე, ყოფილიყო ქართველთა შორის შემრიგებლის ხმა. დელეგაციამ იმედი გამოთქვა, რომ ეკლესია ეროვნული ერთიანობის გამტკიცების ამ მისიას განახლებული სულისკვეთებით გააგრძელებს.
შეერთებული შტატები მოუთმენლად ელის საქართველოს მართლმადიდებელ ეკლესიასთან ურთიერთობის გაღრმავებას", - წერს აშშ-ის საელჩო სოციალურ ქსელში.
