"ეს ჩემთვის დიდი პატივი და პასუხისმგებლობაა - პასუხისმგებლობა ჩვენი ქალაქის, მოსახლეობის, თითოეული ოჯახისა და მომავლის წინაშე",- ასე გამოეხმაურა ვახტანგ გადელია მერობის კანდიდატად წარდგენას.
ვახტანგ გადელიამ მადლობა გადაუხადა მმართველ გუნდს გამოხატული ნდობისთვის.
"მინდა, გულწრფელი მადლობა გადავუხადო საქართველოს პრემიერ-მინისტრს, ბატონ ირაკლი კობახიძეს და „ქართული ოცნების“ გუნდს ჩემდამი გამოცხადებული ნდობისთვის - მეორე ვადით მერობის კანდიდატად წარდგენისთვის.
ეს ჩემთვის დიდი პატივი და პასუხისმგებლობაა - პასუხისმგებლობა ჩვენი ქალაქის, მოსახლეობის, თითოეული ოჯახისა და მომავლის წინაშე.
ჩემი მერობის პერიოდში, ჩვენ ერთად არაერთი წარმატება მოვიპოვეთ, განვახორციელეთ მნიშვნელოვანი ინფრასტრუქტურული, სოციალური და კულტურული პროექტები, ჩვენ გავუღეთ კარი ახალ შესაძლებლობებს - სოფლის მეურნეობის, ტურიზმის, განათლების, სპორტისა და ახალგაზრდობის განვითარებისა და ხელმისაწვდომობის მიმართულებით.
ჩემს გუნდთან ერთად ბოლომდე მივიყვან ყველა ის წამოწყებას, რომელიც ჩემს სენაკელებთან ერთად დავგეგმეთ. ჩვენ ვაგრძელებთ მუშაობას უსაფრთხო გარემოსთვის, ეკონომიკური ზრდისა და სენაკის განვითარების ახალი ეტაპისთვის.
ჩემთვის მთავარი სტიმული ყოველთვის იყო და იქნება ჩემი თანაქალაქელების ნდობა და მხარდაჭერა. სწორედ ეს მხარდაჭერა და სიყვარული მაძლევს ძალას, ყოველდღიურად ვიბრძოლო სენაკის უკეთესი მომავლისთვის.
მჯერა, რომ ერთიანი ძალისხმევით, ერთიანობითა და მიზანდასახულობით ჩვენ შევძლებთ კიდევ უფრო დიდი წარმატებების მიღწევას. ერთად გავაგრძელოთ ის გზა, რომელიც სენაკს აქცევს თანამედროვე, უსაფრთხო და მზარდ ქალაქად, სადაც ყველას ექნება შესაძლებლობა ღირსეული ცხოვრებისა და განვითარებისთვის.
მადლობა თითოეულ თქვენგანს თანადგომისა და მხარდაჭერისთვის. წინ დიდი პროექტებია და მჯერა, რომ სასიკეთო საქმეებს ერთად, წარმატებით განვახორციელებთ!
მშვიდობა საქართველოს!
მეტი განვითარება სენაკს!",აცხადებს ვახტანგ გადელია.
შეგახსენებთ, სენაკის მუნიციპალიტეტის მერის პოსტზე ” ქართულმა ოცნებამ” ვახტანგ გადელიას კანდიდატურა დღეს დაასახელა.
ინფორმაცია “ქართული ოცნების” თავმჯდომარემ, საქართველოს პრემიერ – მინისტრმა, ირაკლი კობახიძემ პარტიის გორგასლის ოფისში გამართულ ბრიფინგზე გაავრცელა.
დღეს ირაკლი კობახიძემ საზოგადოებას ასევე 62 მუნიციპალიტეტის მერობის კანდიდატი წარუდგინა.
ცნობისთვის, ადგილობრივი თვითმმართველობის ორგანოების არჩევნები 2025 წლის 4 ოქტომბერს ჩატარდება. საქართველოს პრეზიდენტის მიერ საქართველოს პრემიერ-მინისტრის თანახელმოწერით გამოცემული განკარგულება არჩევნების დანიშვნის შესახებ ძალაში მიმდინარე წლის 5 აგვისტოს შევიდა.
ავტორი: ჯემალ ღამბაშიძე
